దీపావళి వేళ విషాదం.. కపుర్తలాలో కాల్పుల్లో యువ రెజ్లర్ మృతి

పంజాబ్లోని కపుర్తలా పట్టణం మెహతాబ్గఢ్ ప్రాంతంలో సోమవారం రాత్రి ఈ ఘటన జరిగింది. మణి తన ఇంటి బయట దీపావళి టపాసులు కాలుస్తుండగా, మోటార్సైకిల్పై వచ్చిన ఇద్దరు యువకులు కాల్పులు జరిపినట్లు ప్రాథమిక సమాచారం. ఒక బుల్లెట్ మణి ఛాతిలోకి దూసుకెళ్లడంతో అక్కడికక్కడే కుప్పకూలిపోయాడు. కుటుంబ సభ్యులు వెంటనే కపుర్తలా సివిల్ ఆసుపత్రికి తరలించినప్పటికీ అప్పటికే మరణించినట్లు వైద్యులు ప్రకటించారు.

మణి అసలు లక్ష్యం కాదా

ఈ ఘటనలో మరో కీలక విషయం వెలుగులోకి వచ్చింది. పోలీసుల ప్రాథమిక దర్యాప్తు ప్రకారం, దుండగులు మణిని కాకుండా అదే ప్రాంతంలోని మరో వ్యక్తిని లక్ష్యంగా చేసుకుని కాల్పులు జరిపి ఉండవచ్చని అనుమానిస్తున్నారు. మణి అనుకోకుండా బుల్లెట్కు బలై ఉండవచ్చని డీఎస్పీ శీతల్ సింగ్ వెల్లడించినట్లు టైమ్స్ ఆఫ్ ఇండియా నివేదించింది. అయితే, మణికి ఎవరితోనూ వ్యక్తిగత గొడవలు లేదా శత్రుత్వం లేదని అతడి తండ్రి బగ్గ తెలిపారు. కాల్పుల వెనుక అసలు కారణం ఇంకా నిర్ధారణ కాలేదు.

ఘటనాస్థలం నుంచి రెండు బుల్లెట్ షెల్స్ స్వాధీనం

సమాచారం అందుకున్న డీఎస్పీ శీతల్ సింగ్ పోలీసు బృందంతో ఘటనాస్థలానికి చేరుకున్నారు. అక్కడి నుంచి రెండు ఖాళీ బుల్లెట్ షెల్స్ను స్వాధీనం చేసుకున్నారు. కుటుంబ సభ్యుల వాంగ్మూలాలను నమోదు చేసుకుని కేసు దర్యాప్తు చేస్తున్నారు. అనుమానితులను గుర్తించేందుకు ప్రత్యేక పోలీసు బృందాలు గాలింపు చేపట్టాయి.

ఆరు నెలల క్రితమే వివాహం.. కుటుంబంలో తీవ్ర విషాదం

మణికి సుమారు ఆరు నెలల క్రితమే వివాహమైంది. అతడికి నలుగురు సోదరీమణులు ఉన్నారు. కుటుంబానికి ఆధారంగా ఉన్న యువకుడు ఇలా హఠాత్తుగా మరణించడంతో బంధువులు, స్థానికులు తీవ్ర దిగ్భ్రాంతి వ్యక్తం చేస్తున్నారు. ఈ ఘటనకు సంబంధించి పోలీసులు దర్యాప్తు ముమ్మరం చేశారు. దుండగుల కోసం ప్రత్యేక బృందాలతో గాలింపు చర్యలు చేపట్టినట్లు తెలిపారు.

పంజాబ్లోని కపుర్తలాలో దీపావళి వేళ విషాదకర ఘటన చోటుచేసుకుంది. ఇంటి ముందు టపాసులు కాలుస్తున్న 27 ఏళ్ల యువ రెజ్లర్ మణి అలియాస్ పెహల్వాన్ను దుండగులు కాల్చి చంపారు. పెళ్లయి ఆరు నెలలే అయిన యువకుడు మృతితో కుటుంబంలో తీవ్ర విషాదం నెలకొంది. పోలీసులు కేసు దర్యాప్తు చేస్తున్నారు.