*సూర్యాపేట (ఆజాద్ తెలంగాణ) నవంబర్ 12
మన మువ్వన్నెల జాతీయ జెండా తెలంగాణలోని సూర్యాపేట జిల్లా నడిగూడెం గ్రామంలోని పాత కోటలోనే ఆవిర్భవించింది. దేశభక్తుడు పింగళి వెంకయ్య ఇక్కడే జాతీయ జెండాను రూపొందించారు.
మనం గర్వంగా ఎగురవేసే మువ్వన్నెల జెండా పుట్టిన చోటు మన తెలంగాణలోనే ఉంది. సూర్యాపేట జిల్లా నడిగూడెం గ్రామంలోని పాత కోటలోనే మన జాతీయ జెండా ఆవిర్భవించింది.
జెండా రూపకల్పన వెనుక కథ
మనకు ఒక సొంత జెండా ఉండాలని కలలు కన్న దేశభక్తుడు పింగళి వెంకయ్య. 1906లో కలకత్తాలో జరిగిన ఒక సభలో ఆయనను మునగాల రాజు నాయని వెంకట రంగారావు కలిశారు. మా కోటకు రండి, మీకు ఏం కావాలో అన్నీ ఇస్తాను, మన దేశానికి మంచి జెండా తయారు చేయండి అని రాజుగారు ఆయనను ఆహ్వానించారు. దాంతో పింగళి వెంకయ్య 1906లో నడిగూడెం కోటకు వచ్చి దాదాపు 16 ఏళ్లు అక్కడే ఉన్నారు. అక్కడ వ్యవసాయం చేస్తూ కంబోడియా పత్తి అనే కొత్త రకం పత్తిని కనిపెట్టారు. అందుకే అందరూ ఆయనను పత్తి వెంకయ్య అని పిలిచేవారు.
కోటలోనే జాతీయ జెండా రూపకల్పన
అదే కోటలో ఒక చిన్న గదిలో కూర్చుని ప్రపంచంలోని 25 దేశాల జెండాలను పరిశీలించి, మన మువ్వన్నెల జెండాను రూపొందించారు ఆ గదిని ఈప్పటికీ పింగళి వెంకయ్య గది అంటారు. రాజుగారు ఆయనకు చెక్కతో తయారు చేసిన టేబుల్, కుర్చీ, రంగులు, పెన్నులు అన్నీ సమకూర్చారు. తర్వాత ఆ జెండాను తీసుకెళ్లి 1921లో విజయవాడలో మహాత్మా గాంధీకి చూపించారు. గాంధీజీ ఆ జెండాను చూసి ఎంతో సంతోషించారు. ఆ జెండానే ఈ రోజు మన జాతీయ జెండాగా మారింది.
చారిత్రక కోట దుస్థితి
అంత గొప్ప చరిత్ర ఉన్న కోటను చూడాలని మా ప్రతినిధి వెళితే లోపలికి వెళ్లే పరిస్థితి లేదు. కారణాలు తెలియాల్సి ఉంది. కాబట్టి బయటి నుండే ఫోటో తీసుకొని రావాల్సి వచ్చింది. గ్రామంలో ఆ కోట వద్దకు వెళ్లడానికి విశాలమైన రోడ్డు కూడా లేదు. ఏది ఎక్కడ ఉందో తెలియజేయడానికి ఒక్క బోర్డు కూడా లేదు.
ఇది మనందరి జెండా పుట్టిన ఇల్లు. దీన్ని పై ప్రభుత్వం దృష్టి పెట్టి, దేశ నలుమూలల నుండి అందరూ వచ్చి చూసేలా, ముఖ్యంగా విద్యార్థులు వచ్చి చూసేందుకు వీలుగా మ్యూజియంగా మార్చాలని జిల్లా ప్రజలతోపాటు చుట్టుపక్కల జిల్లాల ప్రజలు కోరుకుంటున్నారు.
