పువ్వాడ నగర్ లో ఇందిరమ్మ ఇళ్ల లబ్ధిదారుల దీపావళి వేడుకలు ప్రభుత్వానికి కృతజ్ఞతలు

రఘునాథపాలెం, 9 November

మండలం పువ్వాడ నగర్ గ్రామంలో ఇందిరమ్మ ఇళ్ల లబ్ధిదారులు తమ ఇళ్లలో దీపావళి పండుగ కార్యక్రమాన్ని ఘనంగా నిర్వహించుకున్నారు.

ఈ కార్యక్రమంలో సర్పంచ్ ఎస్ కే సిద్దిక్ మాట్లాడుతూ, పేదల సొంతింటి కలను నిజం చేస్తున్న ఏకైక ప్రభుత్వం ఇందిరమ్మ ప్రభుత్వమని అన్నారు. ముఖ్యమంత్రి రేవంత్ రెడ్డి ఇచ్చిన మాట ప్రకారం అర్హులైన ప్రతి ఒక్కరికీ ఇందిరమ్మ ఇళ్లు మంజూరు చేస్తున్నారని, ఈ దీపావళికి పేదల ఇంట్లో వెలుగులు నింపిన ఘనత కాంగ్రెస్ ప్రభుత్వానికే దక్కుతుందని తెలిపారు.

అభివృద్ధి పనులపై సర్పంచ్ ప్రశంస

అలాగే, స్థానిక మంత్రి తుమ్మల నాగేశ్వరరావు నియోజకవర్గ అభివృద్ధి కోసం అహర్నిశలు కృషి చేస్తున్నారని, ఆయన చొరవతోనే మండలంలో అర్హులందరికీ ఇళ్లు, అభివృద్ధి పనులు వేగంగా జరుగుతున్నాయని సర్పంచ్ కొనియాడారు.

ఈ కార్యక్రమంలో ఉప సర్పంచ్ ఆచూరి రాణి, కాంగ్రెస్ పార్టీ ప్రధాన కార్యదర్శి కర్నె రాములు, వార్డు సభ్యులు మద్దిరాల శ్రీదేవి, సూర్య బోయిన రజిత, కొమ్ము సుధాకర్, షేక్ రఫీ తదితరులు పాల్గొన్నారు.